गाडगे बाबा आणि संत तुकडोजी महाराज

आठवणीतले गाडगे बाबा.....

वार्धक्यामुळे गाडगे बाबांची  तब्येत वारंवार बिघडत असे. त्यांना उपचार आणि आरामाची गरज असताना ते कधी स्वस्थ बसत नव्हते. योजलेले कार्यक्रम पार पाडण्यासाठी ते जीवाचा आटापिटा करत असत.

स्वतःच्या आरोग्याची चिंता न करता त्यांचे सुरू असलेले समाजकार्य पाहून तुकडोजी महाराज यांनी गाडगे बाबांना एक पत्र लिहिले होते....

सदर पत्र आजही त्यांच्या हस्ताक्षरात उपलब्ध आहे.

सदर पत्रातील मजकूर गाडगे बाबांच्या विचारांनी प्रेरित झालेल्या लोकांसाठी देत आहे....

॥ श्री गुरूदेव ॥

मुक्काम मोझरी दि. ९/६/१९५४

श्री. पू. ह.भ.प. संत गाडगे महाराज,

यांना सप्रेम जयगुरू,

ऐकलं आहे की आपली प्रकृती बरीच बिघडली आहे, कृपा करून आपण विश्रांती घेऊन नंतर कार्यक्रमाला गेलांत तर, फार बरे होईल. आपल्या स्वार्थाने बोलावयाचे तर आपल्यासारख्या महान् त्यागी, नि:स्पृह व जनहितैषी सेवकाची आजच्या भारताला अत्यंत जरूरी आहे. महाराज, आमच्या मृत्युलोकांत तर कांही अमर कीर्तीचे लोक असतील, त्यांत आपली जागा महत्वाची आहे. आपण जेवढे दिवस अधिक रहाल तेवढी ईश्वराची कृपा समजूं. समाजांत तोंडाची विद्वत्ता सांगणारे लोक बहुत आहेत पण हातांत खराटा घेऊन, लोकांच्या झोपडयांत भाकरी हातांत घेऊन, सडकेवर खाऊन लोकांचे हित करणारे लोक बोटांवर मोजण्याएवढेही नाहीत. तेंव्हा आपण बिमार आहांत असे कळले की, मन दुःखी होते. आम्ही आपले शिष्य वा सांप्रदायी नसलो तरी आपल्या केलेल्या जनता- -जनार्दनाच्या सेवेचं जे आपल्यात तेज, ओज व कळकळ आहे त्याचे आम्ही दास आहोत.

जे जे कोणी धर्माचे, परधर्माचे, जातीचे, विजातीचे लोक हे कार्यवजा अधिकार ठेवतील त्यांना आम्ही देवापेक्षांही मोठे मानूं असा आमचा सिद्धांत आहे. तेंव्हा आपण अधिक दिवस मानवाची सेवा करावी व तसे उदंड आयुष्य ईश्वराने आपणाला द्यावे अशी देवाजवळ प्रार्थना आहे. श्रीपंढरपूरला भेट होईलच. आपल्याजवळील कळकळीच्या व आपल्या आज्ञेने सदैव वागणाऱ्या लोकांचीही धन्य आहे. सर्व मंडळींना माझा जयगुरू.

तुकडयादास

वरील पत्रातील आशय आपणास फार काही शिकवून जातोय. आज सर्व सुविधा असूनही आपल्याच घरातील मंडळी खरंच आपल्या वार्धक्याच्या काळात आपली इतकी आपुलकीने चौकशी करतील का हा प्रश्न मनात आल्याशिवाय राहत नाही.

ना अंगावर नीट कपडे, ना कोणता बँक बॅलन्स पण मनाची श्रीमंती जपलेल्या गाडगे बाबांविषयी लोकांच्या मनात असलेले काळजीवाहू विचार खूप काही सांगून जातात.

- राजू ठोकळ